SPADES (Unang Labas)

SPADES (Unang Labas)

PUDONG DISTRICT, SHANGHAI, CHINA. 2017.Tanaw niya mula sa minamaneho niyang kotse ang nagngangalit na lagablab ng apoy na nagmumula sa malaking mansyon ng mga Lee. 

Halos mga sampung metro na lamang ang layo niya  mula sa gate ng malaking bakuran ng mansyon nang ihinto niya ang sasakyan. 

Mabilis siyang bumaba mula doon at nagmamadali siyang tumakbo patungo sa nakabukas na maliit na pintuan ng gate. 

Nasa bungad na siya nang pintuan nang bigla siyang napaatras. 

Nanlaki ang kanyang mga mata nang makita niya na tumatakbo ang anak na binata ni David Lee na si Patrick. 

Duguan ito at may tama ng bala sa kaliwang balikat nito. 

Nakalingon ang binata sa kanyang likuran at walang tigil sa pagpapaputok ng hawak niyang baril habang siya ay tumatakbo patungo sa may gate. 

Sunud-sunod at halos walang patlang ang pagpapaputok ng apat na kalalakihan na nakilalala niyang mga bodyguard ni David Lee na ang pinupuntirya at hinahabol ay walang iba kundi ang anak ng kanilang amo. 

 Magkahalong kaba at matinding pagkalito ang rumehistro sa sa mukha  ng dalaga. 

At ang kabang iyon ay naging ganap na takot nang mula sa likod ng mga armadong kalalakihan ay biglang lumitaw si Raymond Lee. Ang kapatid na panganay ni Patrick na may hawak ding baril at walang habas din ang pagpapaputok na ang pinupuntirya ay ang kanyang kapatud. 

“ ‘WAG N’YONG HAYAAN NA MAKALAYO! DUGO LANG NYA  ANG TATAPOS SA PROBLEMANG ITO. PATRICCCCKKKKKK! “ galit na sigaw ni Raymond habang patuloy ang paghabol at pagpapaputok. 

“ PATRICK!! SUMUNOD KA SA AKIN! ANDUN ANG KOTSE KO…BILIS! “ sigaw ng dalaga sa duguang lalaki hbang inuunahan niya sa pagtakbo patungo sa nakaparadang sasakyan. 

Hindi alam ng tsinitang dalaga kung saan siya nanghiram ng bilis para makasakay sa loob ng kotse at mapa-start agad ang makina niyon. 

Si Patrick naman ay patuloy sa pagganti ng putok sa mga humahabol sa kanya habang sumasakay sa may front seat. 

Mabilis na nagmaniobra ang dalaga sabay kabig sa manibela patungo sa may tulay na kanyang pinanggalingan kanina. 

Mabilis at halos lumipad ang kotse na kanilang sinasakyan pero ang mga balang humahabol sa kanila ay patuloy ang pagtama sa body at salamin ng sasakyan. 

“PUTANG INA, PATRICK … ANO BA ANG NANGYARI! “ tanong ng dalaga sa duguang binata na noon ay bahagya nang kumakalma. 

Hindi sumagot ang binata. 

Hinayaan niyang makapag-concentrate sa pagmamaneho ang babae. 

Wala siyang nasa isip sa mga sandaling iyon kundi ang makalayo sila at makatakas sa mga humahabol sa kanila. 

Malayo na ang kanilang narating nang nagsalita si Patrick. 

Noon ay naramdaman ng binata na parang unti-unti nang bumabagal ang takbo ng kotse.  

Naisip niya na posibleng nag-relax na ang dalaga sa pagmamaneho dahil napakalayo na nila at imposible nang mahabol pa sila ng mga kalaban. 

“ Mabuti na lang at dumating ka…” mahinang wika nito habang nakatingin sa nagmamanehong babae. 

Hindi kumibo ang dalaga na ikinagulat ni Patrick. 

Nanlaki ang mga mata ng binata nang mapansin niya na may umaagos na dugo sa mukha ng dalaga. 

At bago pa siya nakakilos ay bigla na lang bumagsak ang mukha nng babae sa mismong manibela ng kotse. 

At hindi na alam ni Patrick ang sumunod na nangyari. 

Basta ang huli niyang nakita ay mabilis ang takbo ng pagewang-gewang na sasakyan na ang tinutumbok ay ang isang malaking puno na nasa tabi ng highway. 

At pagkatapos niyon ay ipinikit na lamang ng binata ang kanyang mga mata at kasunod noon ay isang malakas na lagabog ang huli niyang narinig.ITUTULOY 

Leave a Reply

Your email address will not be published. Required fields are marked *