Sa pinakabagong kabanata ng showbiz-pulitika crossover, muling pinatunayan ni Aiko Melendez na hindi lang siya reyna ng mga bida-kontrabida roles kundi pati na rin sa larangan ng serbisyo publiko. Sa katatapos na 2025 midterm elections, muling nanalo si Aiko bilang konsehal ng 5th District ng Quezon City, isang posisyong dati na niyang hinawakan mula 2001 hanggang 2010 at muling napanalunan noong 2022.
Hindi lang ito basta panalo, ito ay isang resounding victory na nagpapakita ng kanyang dedikasyon sa kanyang mga nasasakupan.
Samantala, hindi naging matagumpay ang political ventures ng dalawang kilalang aktres na sina Abby Viduya at Ara Mina.
Si Abby, na kilala rin bilang Priscilla Almeda, ay tumakbo bilang konsehal sa 1st District ng Parañaque, kapalit ng kanyang asawang si Jomari Yllana, na nagsilbi ng tatlong termino. Kasama siya sa ticket ni Rep. Edwin Olivarez ng Lakas-CMD. Gayunpaman, hindi siya pinalad na manalo.
Si Ara Mina naman ay muling sumubok sa pulitika bilang konsehal sa 2nd District ng Pasig City, sa ilalim ng tiket ni mayoralty candidate Sarah Discaya. Sa kabila ng kanyang dedikasyon at advocacies para sa PWDs, hindi rin siya nagtagumpay sa eleksyon.
Ang tatlong aktres na ito ay may isang common denominator… ang aktor na si Jomari Yllana. Si Aiko ay dating asawa ni Jomari at may anak silang si Andre. Si Abby naman ay ang kasalukuyang asawa ni Jomari, sila ay ikinasal sa isang civil wedding sa Las Vegas noong Nobyembre 5, 2023.
Sa isang panayam, sinabi ni Aiko na masaya siya para kay Jomari at Abby, ngunit umaasa siyang isasama ni Jomari ang kanilang anak sa kanyang buhay.
Samantala, si Ara Mina ay inamin na si Jomari Yllana ang isa sa mga dahilan ng kanilang 16-taong alitan ni Aiko. Nagkaroon sila ng misunderstanding noong 2001 nang maging magkasintahan sina Ara at Jomari habang kasal pa si Aiko kay Jomari. Ngunit noong 2017, nagkabati na rin ang dalawa.
Ang pagpasok ng mga artista sa pulitika ay hindi na bago sa Pilipinas. Marami sa kanila ang nagtagumpay, ngunit marami rin ang hindi pinalad. Ang tagumpay ni Aiko ay maaaring maiugnay sa kanyang karanasan at dedikasyon sa serbisyo publiko, habang ang pagkatalo nina Abby at Ara ay maaaring dulot ng kakulangan sa political machinery o suporta mula sa mga botante.
Sa pagtatapos ng eleksyon, malinaw na si Aiko Melendez ay muling nagtagumpay sa kanyang political career, habang sina Abby Viduya at Ara Mina ay kailangang mag-isip kung saan sila susunod na tutungo. Sa mundo ng pulitika, tulad ng sa showbiz, ang tagumpay ay hindi laging garantisado.
Ngunit sa kabila ng lahat, ang kanilang mga kuwento ay patunay na ang buhay ay puno ng twists and turns, at ang bawat isa sa kanila ay may sariling script na sinusundan.
Ang tatlong aktres ay minsang naugnay sa aktor na si Jomari Yllana, pero sa pagkakataong ito, parang gustong kumanta ni Councilor Aiko ng…. ‘Ako Ang Nagwagi’. Charennnggg!
‘Yun na!
