Hindi na uusad ang paggamit ng pekeng identification cards (IDs) ng mga Persons with Disabilities (PWD) sa harap ng inilunsad na kampanya ng Department of Social Welfare and Development (DSWD) laban sa kanilang paglaganap.
Ayon kay Social Welfare Secretary Rex Gatchalian, sa naganap na round table discussion kasama ang iba’t ibang stakeholders, napagkasunduan ang paglikha ng unified ID system na magsisilbing web-based portal para sa real-time updating at ID verification ng mga business establishments.
“The creation of a unified ID system which will employ a web-based portal will be launched the soonest,” pahayag ni Gatchalian.
Hinihikayat din ng DSWD ang publiko na agad mag-ulat ng mga pinaghihinalaang pekeng PWD IDs. Ang mga ulat ay maaaring ipasa sa National Council on Disability Affairs (NCDA) sa pamamagitan ng email sa council@ncda.gov.ph, sa Persons with Disability Affairs Office (PDAO), o sa mga law enforcement agencies. Samantala, naglunsad na rin ng crackdown ang Bureau of Internal Revenue (BIR) laban sa ilegal na pagbebenta at paggamit ng pekeng PWD IDs.
Sa ilalim ng National Council on Disability Affairs’ Administrative Order No. 001, Series of 2008, ang mga PWD IDs ay eksklusibong ibinibigay sa mga indibidwal na may permanenteng kapansanan tulad ng speech impairment, learning disability, intellectual disability, mental disability, visual disability, psychosocial disability, physical disability, deaf and hard-of-hearing, cancer, at rare diseases.
Ang mga lehitimong PWD IDs ay maaaring makuha mula sa city o municipal government kung saan naninirahan ang taong may kapansanan.