Sa isang makasaysayang desisyon, ibinasura ng Pasay Regional Trial Court (RTC) Branch 114 ang ‘Motion to Quash’ na inihain ng mga akusadong sina Jojo Nones at Richard Cruz. Ang dalawa ay nahaharap sa kasong ‘Rape Through Sexual Assault’ na isinampa ng Department of Justice (DOJ) at ng aktor na si Sandro Muhlach. Kasabay ng desisyong ito, isinagawa rin ngayong araw ang kanilang arraignment at pre-trial.
Sa kanilang mosyon, hiniling nina Nones at Cruz na ibasura ang mga kaso laban sa kanila dahil sa umano’y kakulangan ng ebidensya at mga legal na basehan. Gayunpaman, matapos ang masusing pagsusuri, pinagtibay ng hukuman na may sapat na merito ang mga paratang upang ituloy ang paglilitis. Ayon sa desisyon, ang mga alegasyon ay may matibay na batayan at nararapat lamang na dinggin sa korte.
Sa parehong araw, isinagawa ang arraignment kung saan pormal na binasa sa mga akusado ang mga sakdal laban sa kanila. Kapwa sila nagpahayag ng ‘not guilty’ sa mga paratang. Sinundan ito ng pre-trial conference na naglalayong plantsahin ang mga isyung procedural at tiyakin ang maayos na daloy ng paglilitis.
Konting background ng kaso, mga nini… Noong Oktubre 2024, inirekomenda ng DOJ ang pagsasampa ng kasong ‘Rape Through Sexual Assault’ at dalawang bilang ng ‘Acts of Lasciviousness’ laban kina Nones at Cruz. Ito ay matapos maghain ng reklamo si Muhlach, na positibong itinuro ang dalawa bilang mga salarin sa umano’y pang-aabuso sa kanya. Ayon sa DOJ, malinaw na naipakita ni Muhlach ang mga elemento ng puwersa at pananakot sa insidente.
Noong Pebrero 13, 2025, ibinasura ng Pasay Metropolitan Trial Court Branch 46 ang dalawang kasong ‘Acts of Lasciviousness’ laban sa mga akusado. Ayon sa hukuman, ang mga nasabing kaso ay saklaw na ng mas mabigat na kasong rape na isinampa sa RTC, kaya’t hindi na kinakailangang litisin pa nang hiwalay. Tinawag ng hukuman na isang ‘overkill’ ang pagsasampa ng magkahiwalay na kaso para sa parehong insidente.
Sa mga naunang pagdinig, mariing itinanggi nina Nones at Cruz ang mga paratang. Sa isang pagdinig sa Senado noong Agosto 2024, ipinahayag nila na walang katotohanan ang mga akusasyon at sila’y biktima ng maling paratang. Binanggit din nila na bilang mga bakla, hindi sila gagawa ng ganitong klaseng krimen at nanawagan sila na huwag silang husgahan hangga’t hindi pa tapos ang proseso ng paglilitis.
Matapos ang mga kaganapan ngayong araw, nakatakdang ituloy ang regular na paglilitis sa mga susunod na buwan. Patuloy na umaasa ang magkabilang panig na mananaig ang hustisya batay sa mga ebidensyang ihaharap sa hukuman.
Ang kasong ito ay nagsisilbing paalala sa kahalagahan ng due process at patas na paglilitis. Habang patuloy ang proseso, nararapat lamang na igalang ang karapatan ng bawat isa at hintayin ang pinal na desisyon ng hukuman. Sa huli, ang katotohanan at hustisya ang dapat manaig.
‘Yun na!
