HINULAAN ng isang kilalang psychic ang kapalaran ng mga Kapuso artists para sa Year of the Wooden Snake. Natanong sa kanya kung ano ang nakikita niya sa mag-asawang Dingdong Dantes at Marian Rivera para sa darating na taon. Aniya, si Dingdong Dantes daw ay patuloy na mamamayagpag ang karera hindi lang sa pag-arte kundi sa hosting. Patok daw ang show nitong “Family Feud” na laging nangunguna pagdating sa ratings game. Gayunpaman, pinag-iingat niya ang Kapuso actor dahil posible raw na maging takaw-aksidente ito ngayong taon lalo pa’t kasama nga naman sa hobby ni Dong ay ang mag-motorcross. Speaking of his wifey na si Marian Rivera, maganda raw ang pasok ng taon sa Kapuso Primetime Queen ayon sa kanyang vibes.
Babalik daw ito sa paggawa ng teleserye at aani rin daw ng awards ngayong taon dahil sa pelikula nitong ginawa at gagawin pa. Nakikita raw niya ang malaking posibilidad na magbuntis din ito sa taon ng mga Ahas. Well, hindi naman imposibleng mangyari iyon dahil bago matapos ang taon ay nag-renew ng marriage vows ang showbiz couple kung saan ipinagdiwang nila ang kanilang ika-sampung anibersaryo. Espesyal din ang event dahil dinaluhan ito ng kanilang mga tsikiting. Siyempre, after ng kanilang renewal ng vows ay naroon na magdiwang sila at magkaroon ng honeymoon. Anyway, kung mabubuntis man si Marian ngayong taon, sigurado namang magbubunyi ang DongYan fans. *** MTRCB, Tiniyak ang Patuloy na Pagsusulong ng Responsableng Panonood at Pagsuporta sa Industriya ng Paglikha ngayong 2025 Sa ika-apatnapung taon ng Movie and Television Review and Classification Board (MTRCB), muling tiniyak ng Board ang pagsusulong sa mandato nitong proteksyunan ang pamilya at kabataang Pilipino sa pamamagitan ng responsableng regulasyon sa media at patuloy na pagsuporta sa industriya ng pelikula at telebisyon sa bansa.
Ipinahayag ni MTRCB Chairperson and CEO Lala Sotto-Antonio ang malalim na dedikasyon ng Board na maihatid sa publiko ang tamang impormasyon at responsableng paggamit ng media na siyang may malaking parte sa paghubog ng lipunan. “Ngayong 2025, mananatili po tayong matatag sa ating misyon na maisulong ang responsableng panonood para sa kapakanan ng pamilyang Pilipino,” sabi ni Sotto-Antonio. “Atin din tinitiyak ang patuloy na pagsuporta sa industriya ng paglikha sa bansa sa pamamagitan ng pagbibigay ng angkop na klasipikasyon sa bawat palabas at pelikula at ang patuloy na pakikipag-ugnayan sa mga stakeholder.” Dagdag pa ni Sotto-Antonio na mas palalakasin pa ng MTRCB ang pakikipag-kolaborasyon sa lokal na mga direktor, producer, at TV network, pati na rin sa mga streaming platform at mga kaalyadong bansa. Sa pamamagitan nito, mas matutugunan ng MTRCB ang iba’t ibang hamon pagdating sa media regulation habang pinapaunlad ang masining at inobasyon sa industriya ng pelikula at telebisyon.
Ayon pa kay Sotto-Antonio, ipagpapatuloy ng Ahensya ang pagsusulong ng kampanyang “Responsableng Panonood” na layong maturuan ang publiko sa importansya ng tama at angkop na pagpili ng mga palabas, partikular sa mga batang manonood. At dahil sa mabilis na paglago ng digital platforms at teknolohiya sa bansa, nangako rin ang MTRCB na gamitin ang mga makabagong pamamaraan pagdating sa polisiya at regulasyon, at sa pagpapanatili ng Filipino cultural values na siyang pamantayan para sa proteksyon ng mga manonood.
