Sa mundo ng showbiz, hindi na bago ang mga intriga at kontrobersya. Ngunit ang kasalukuyang alitan sa pagitan ng kilalang direktor na si Darryl Yap at ng batikang aktor at TV host na si Vic Sotto ay tunay na patuloy na umuugong sa industriya.
Nagsimula ang lahat nang ilabas ni Direk Darryl Yap ang teaser ng kanyang pelikulang ‘The Rapists of Pepsi Paloma’ (TROPP). Sa nasabing teaser, diretsahang binanggit ang pangalan ni Vic Sotto bilang isa sa mga diumano’y nang-abuso sa yumaong sexy star na si Pepsi Paloma. Dahil dito, agad na umalma si Bossing Vic at nagsampa ng 19 na bilang ng cyberlibel laban kay Yap sa Muntinlupa City Prosecutor’s Office noong Enero 9, 2025, na may kabuuang danyos na P35 milyon—P20 milyon para sa moral damages at P15 milyon para sa exemplary damages.
Bilang tugon sa petisyon ni Sotto para sa writ of habeas data, iniutos ng Muntinlupa Regional Trial Court Branch 205 noong Enero 24, 2025, na tanggalin ni Yap ang 26-segundong teaser mula sa lahat ng online platforms at social media. Ayon sa korte, maling ginamit ang impormasyon sa pagpapakita ng usapan sa pagitan ng dalawang yumaong indibidwal na hindi maaaring mapatunayan kung tunay na naganap. Gayunpaman, pinayagan pa rin ng korte ang pagpapatuloy ng produksyon at pagpapalabas ng pelikula.
Sa kabila ng mga legal na hakbang, lumutang ang balita na nagpadala ng feelers si Direk Darryl Yap sa kampo ni Bossing Vic upang makipag-areglo at tapusin na ang kaso. Subalit, mariing tinanggihan ito ng kampo ni Sotto, na nagsabing kahit bilyong piso pa ang ialok, hindi sila papayag sa anumang aregluhan. Nauunawaan naman ng marami ang matinding damdamin ni Bossing Vic, lalo’t hayagang pinangalanan siya sa pelikula bilang isa sa mga nang-abuso kay Pepsi Paloma. Labis itong nakasira sa kanyang imahe at reputasyon bilang isa sa mga iginagalang at tinitingala sa industriya ng pelikula at telebisyon.
Maraming netizens at mga kasamahan sa industriya ang nagpahayag ng kanilang opinyon sa isyung ito. May mga nagsasabing naging mayabang si Direk Darryl Yap, tila ba nakasandal sa pader dahil sa kanyang koneksyon kay Senator Imee Marcos. Ngunit itinanggi ni Yap na may kinalaman si Senadora Imee, Jalosjos, o Discaya sa kanyang pelikula, at iginiit na ang kanyang lakas ng loob ay nagmumula sa kanyang paniniwala sa katotohanan.
Noong Marso 26, 2025, dumalo si Direk Darryl Yap sa Muntinlupa Regional Trial Court para sa kanyang arraignment kaugnay ng dalawang kaso ng cyberlibel na isinampa ni Vic Sotto. Mula sa orihinal na 19 na bilang, dalawang kaso ang itinuloy ng korte, na ngayon ay haharapin ni Yap sa mga susunod na pagdinig.
Ang kontrobersyang ito ay nagsisilbing paalala sa lahat ng nasa industriya ng pelikula at media na maging maingat sa pagpapahayag ng impormasyon, lalo na kung ito ay maaaring makasira sa reputasyon ng iba. Sa panahon ng digital media, mabilis kumalat ang balita, kaya’t mahalagang tiyakin na ang bawat pahayag ay may sapat na basehan at hindi lumalabag sa karapatan ng iba.
Nawa’y magsilbing leksyon ito sa lahat na ang kalayaan sa pagpapahayag ay may kaakibat na responsibilidad. Ang respeto sa kapwa at ang pagsunod sa etika ng propesyon ay dapat laging isaalang-alang upang mapanatili ang integridad ng industriya.
‘Yun na!
