Sa patuloy na paglikha ng markadong papel sa industriya ng pelikula, muling magpapamalas ng kanyang husay si Jodi Sta. Maria sa horror-thriller na ‘Untold’—ang kanyang kauna-unahang proyekto sa ilalim ng Regal Films. Bagamat inakala ng marami na ito na ang kanyang ikalimang horror film, nilinaw ng aktres na ito ay kanyang ikaapat na pagsabak sa ganitong genre.
“Matagal ko nang gustong makatrabaho ang Regal Films. Lumaki akong nanonood ng ‘Shake, Rattle & Roll’ at ‘Regal Shocker’, kaya isang katuparan ng pangarap ito para sa akin,” ani Jodi sa isang panayam.
Sa ‘Untold’, ginagampanan niya ang papel ni Vivian Vera, isang premyadong journalist na kilala sa kanyang mga kontrobersyal na kwento. Ngunit sa likod ng kanyang tagumpay ay ang kanyang masalimuot na nakaraan—mga kwentong pinilit niyang ibaon ngunit unti-unting babangon upang siya’y hantingin.
Kung ang ‘Clarita’ (2019) ay nakatuon sa supernatural na mga elemento, ibang klaseng horror naman ang ihahatid ng ‘Untold’. Ito ay isang psychological horror na tumutuklas sa takot na nagmumula mismo sa ating kalooban.
“Ang pinaka-nakakatakot minsan ay hindi ang mga multo kundi ang sariling konsensya natin,” pagbabahagi ni Jodi. “Dito, mapapaisip ang tao kung ano ang tunay na ibig sabihin ng moralidad, katotohanan, at kung hanggang saan ang kaya nilang isakripisyo para sa sarili nilang kapakanan.”
Sa direksyon ng isang eksperto, ang ‘Untold’ ay nasa ilalim ng direksyon ni Derick Cabrido, na siyang naghatid din ng ‘Clarita’. “Isa itong pelikulang hindi lang takutan kundi isang introspective experience,” ayon kay Cabrido. “Pagkatapos nitong panoorin, hindi lang takot ang mararamdaman ng audience—may mga tanong silang babaunin.”
Kasama ni Jodi sa makapangyarihang cast ng pelikula ang ilan sa pinakamahuhusay na artista sa industriya, si Kaori Oinuma, na gaganap bilang isang batang journalist na haharap sa mapanganib na katotohanan. Si Juan Karlos ‘JK’ Labajo, sa papel ng isang misteryosong tauhan na may hawak ng sagot sa nakaraan ni Vivian. At si Ms. Gloria Diaz, bilang isang enigmatic figure na may koneksyon sa madilim na sikreto ni Vivian.
Si Jodi ay isang aktres na hindi takot sa anumang hamon. Sa halos tatlong dekada niya sa industriya, ipinakita ni Jodi ang kanyang versatility bilang aktres—mula sa pagiging ligawin sa ‘Tabing Ilog’, hanggang sa pagiging isang mapagmahal na yaya sa ‘Be Careful With My Heart’, at isang mapaghiganting asawa sa ‘The Broken Marriage Vow’. Ngayon, sa ‘Untold’, isang panibagong hamon ang kanyang haharapin.
“Sa bawat proyektong ginagawa ko, gusto kong ipakita ang iba’t-ibang bersyon ng sarili ko bilang artista. Ang ‘Untold’ ay isang pelikulang lalong nagpabukas ng aking isip at puso sa mas malalim na storytelling,” sabi ni Jodi.
Ang ‘Untold’ ay ipapalabas sa buong bansa sa Abril 30, 2025. Handa ka na bang harapin ang katotohanan na minsan, ang pinaka-nakakatakot ay hindi ang nasa labas kundi ang nasa loob mo?
