Sa loob ng siyam na buwang paghihintay, heto na ang sandali na matagal nang inaasam ni Sandro Muhlach—ang pagkakataong makapagsalita sa korte at ipaglaban ang kanyang katotohanan. Ngayong tumayo na siya sa witness stand sa Pasay Regional Trial Court, mas lalo niyang pinagtibay ang kanyang laban laban sa mga independent contractors na sina Jojo Nones at Richard Cruz, na kanyang inakusahan ng pang-aabuso.
Ngunit kahit pa isang mahalagang yugto na ang kanyang napagtagumpayan, hindi pa tapos ang laban.
“We’re one step closer to justice. Malapit na rin ‘to. Matatapos na ‘to,” mariing pahayag ni Sandro, punong-puno ng determinasyon at emosyon ang kanyang tinig.
Hindi biro ang pinagdaanan ni Sandro at ng kanyang pamilya. Ang proseso ng paghihintay, ang paulit-ulit na pagdinig, at ang matinding emosyonal na bigat ng kaso ay naging isang malaking pagsubok para sa kanya. Ngunit sa kabila ng lahat, nanatili siyang matatag, lumalaban sa bawat hakbang, at kumukuha ng lakas sa mga taong nagmamahal sa kanya.
“Coping. I’m not saying I’m fully healed. Pero ‘yung suporta ng parents ko, suporta ng mom ko, ng girlfriend ko, lahat sila nandiyan lang sa tabi ko. Hindi ko na-feel na mag-isa ako kase nandiyan sila sa tabi ko.”
Kakaiba ang bigat ng ganitong laban, lalo na sa isang public figure na tulad niya. Hindi lang pisikal na pagod kundi pati mental at emosyonal na pighati ang dinadala niya araw-araw. Isang tahimik ngunit mabagsik na digmaan ang kanyang nilalabanan—isang laban para sa kanyang dignidad, karapatan, at katarungan.
Hindi rin matatawaran ang suporta ng Department of Justice (DOJ) at ng National Bureau of Investigation (NBI), lalo na ang Behavioral Science Division (BSD), na hindi bumitaw sa kanyang tabi mula noong simula ng kaso.
“Maraming salamat po sa BSD kase talagang tinutukan at inalagaan nila ako,” pasasalamat ni Sandro.
Ang ganitong klaseng laban ay hindi madali, kaya napakahalaga ng pagkakaroon ng mga taong handang lumaban kasama niya. At sa kaso ni Sandro, hindi lang pamilya at kaibigan ang nasa likod niya kundi pati ang mga institusyon ng batas na nagbigay sa kanya ng lakas ng loob upang ipaglaban ang kanyang karapatan.
Ayon kay Sandro, nasa kalahati na ang kaso—isang mahalagang milestone sa kanyang landas patungo sa hustisya. Ngunit kahit nakapagsalita na siya sa korte, may mas matitinding rebelasyon pang inaasahan sa mga susunod na pagdinig.
“Wala pa. Wala pa ‘yung mga important details, pero next hearing, nandun na lahat ‘yun.”
Bukod kay Sandro, anim pang saksi mula sa NBI at BSD ang tumayo upang patibayin ang kanyang kaso. Ang kanilang presensya ay hindi lang simbolo ng suporta kundi patunay na may bigat ang kanyang mga paratang. Ipinapakita nito na ang laban ni Sandro ay hindi lamang personal kundi isang laban para sa katotohanan at katarungan.
Mahabang panahon na ang lumipas mula noong unang lumabas ang kaso. Siyam na buwan ng sakit, takot, at kawalan ng katiyakan. Ngunit ngayon, nasa harap na siya ng pintuan ng hustisya.
“It’s been 9 months since nangyari ‘to. Ang tagal din ng hinintay namin. Buong family namin, ang daming pinagdadaanan because of this. Pero ito na. Malapit na. This is the time na makakabawi na tayo at makakamit ko na ‘yung justice para saken.”
Sa kabila ng mga sugat na iniwan ng karanasang ito, nananatili siyang matatag. Alam niyang ang laban na ito ay hindi lamang tungkol sa kanya kundi tungkol sa lahat ng biktima ng pang-aabuso na natatakot magsalita.
Hindi lang ito kwento ng isang artista na lumalaban sa korte. Ito ay kwento ng isang tao na piniling manindigan, magsalita, at lumaban para sa kanyang dignidad.
At ngayon, habang patuloy ang pagdinig sa kaso, isang bagay ang sigurado—hindi uurong si Sandro Muhlach. Lalaban siya hanggang dulo. Hanggang makamit ang hustisya.
Isang hakbang na lang. Malapit na.
‘Yun na!
