Sa isang bansang patuloy na nakikipagbuno sa korapsyon at sirang sistema ng gobyerno, si Atty. Levito D. Baligod ay isang tunay na mandirigma ng hustisya. Walang takot niyang hinaharap ang mga may kapangyarihan upang isiwalat ang katiwalian at protektahan ang kaban ng bayan. Sa kanyang dedikasyon, marami nang naipakulong, at mas marami pa siyang gustong baguhin upang maiahon ang bansa sa paulit-ulit na siklo ng pangungurakot.
Si Atty. Baligod ay nagmula sa isang simpleng simula patungo sa totoong laban ng katarungan.
Ipinanganak sa Tuao, Cagayan, si Baligod ay lumaki na may matibay na paninindigan sa katotohanan at hustisya. Nagtapos siya ng Economics at Political Science sa University of the Philippines at kalaunan ay kumuha ng abogasya sa University of the East. Nang pumasa siya sa Bar noong 2000, agad niyang pinatunayan na siya ay isang abogado ng masa—walang kinatatakutan, walang sinasanto.
Unang lumutang ang pangalan niya noong 2013 nang siya ang maging legal counsel ni Benhur Luy, ang whistleblower sa Php10-bilyong pork barrel scam na kinasangkutan ni Janet Lim-Napoles at ilang mambabatas. Dahil sa tapang niya, nabunyag ang isa sa pinakamalaking eskandalo ng korapsyon sa kasaysayan ng bansa.
Pero hindi doon natapos ang laban niya. Noong 2015, naghain siya ng kaso laban sa iba pang mga NGO na hindi konektado kay Napoles ngunit sangkot din sa maling paggamit ng pondo ng bayan. Ipinakita niya na hindi siya namimili ng kalaban—basta’t may ginawang mali, mananagot ka.
“‘Yun po ang umpisa ng aking adbokasiya sa graft and corruption at laban sa mga tiwali na nagnanakaw sa kaban ng bayan.'”
Bukod sa paglaban sa katiwalian, nais ding baguhin ni Baligod ang paraan ng paglalaan ng pondo ng gobyerno. Iminungkahi niya ang pagpapalit mula sa taunang badyet patungo sa anim na taong plano na nakaayon sa termino ng Pangulo.
Ayon sa kanya, hindi lang oras ang nasasayang sa paulit-ulit na prosesong ito kundi nagiging pagkakataon din ito para sa mga pulitikong ginagamit ang budget sa kanilang pansariling interes. Dahil dito, maraming proyekto ang hindi natatapos o nababago sa bawat palit ng administrasyon.
Isang halimbawa nito ay ang dredging project sa Laguna Lake noong panahon ni dating Pangulong Gloria Macapagal-Arroyo. Naaprubahan na ang pondo para dito, ngunit dahil sa pulitikang naghari pagkatapos ng kanyang termino, natigil ang proyekto. Sayang ang pondo, sayang ang pagkakataon para sa progreso.
Sa anim na taong budget, naniniwala si Baligod na magkakaroon ng tuloy-tuloy na pagpapatupad ng mga mahahalagang proyekto sa edukasyon, kalusugan, imprastraktura, at agrikultura—mga sektor na madalas na naaapektuhan ng biglaang pagbabago sa gobyerno.
Kung maisasakatuparan ito, isang malaking hakbang ito tungo sa mas epektibong pamamahala, malayo sa impluwensya ng pulitikang naghahari-harian.
Isa sa mga pinakamalapit sa puso ni Baligod ay ang mga magsasaka. Alam niya ang sakripisyo ng mga ito, ang hirap ng pagbabanat ng buto sa ilalim ng tirik na araw, at ang kakarampot na kita na kanilang natatanggap.
“‘Alam ko kase ang hirap ng buhay ng isang magsasaka. Nabibitak ang kamay. Nabibitak ang paa. Nakabilad sa araw, para lang may maihain silang pagkain sa kanilang pamilya.'”
Ang mas masakit pa, ang kaunting tulong mula sa gobyerno na dapat sana’y para sa kanila ay napupunta lamang sa bulsa ng mga tiwaling opisyal.
“‘At ‘yung kakarampot na ayuda ng gobyerno sa mga magsasaka sana ay ‘yun pa ang ninanakaw.'”
Ayon kay Baligod, 60 hanggang 70 porsyento ng pondong dapat ay para sa mga magsasaka ay ibinubulsa ng mga mambabatas. At ito ang nais niyang tuldukan.
Dahil sa kanyang matinding kampanya laban sa korapsyon, marami na siyang naipakulong.
“‘Nakapagpakulong na po tayo ng apat na taon ng tatlong senador at mga congressmen. At marami pang ongoing na kaso na dinidinig hanggang ngayon sa Sandiganbayan.'”
Ngunit para sa kanya, hindi pa dito nagtatapos ang laban. Noong 2025, opisyal niyang inanunsyo ang kanyang pagtakbo bilang kinatawan ng ika-5 distrito ng Leyte. Hindi lang siya basta tatakbo—may malinaw siyang plano para sa mas matibay na pundasyon ng pagbabago. Hindi lang pangako, kundi kongkretong solusyon para sa kahirapan, kawalan ng pagkain, at maling paggamit ng pondo ng gobyerno.
Nasabi ni Atty. Baligod sa Pinoy News Channel na kung sakaling gawing pelikula ng buhay niya, ready na ang cast!
Kung isasapelikula ang buhay ni Baligod, alam na niya kung sino ang gusto niyang gumanap bilang siya—ang beteranong aktor at public servant na si Richard Gomez. At syempre, para sa role ng kanyang asawa na si Malot, sino pa nga ba kundi ang walang kupas na si Dawn Zulueta.
Bukod sa paghanga sa kanilang talento, naniniwala si Baligod na ang mga artista ay may karapatang tumakbo sa gobyerno basta’t mayroon silang tunay na malasakit sa tao.
Sa isang mundong nilalamon ng kasakiman at pansariling interes, si Atty. Levito Baligod ay isang tinig na hindi kayang patahimikin. Ang kanyang laban para sa hustisya, ang kanyang malasakit sa maliliit, at ang kanyang matapang na paninindigan laban sa katiwalian ay patunay na hindi pa huli ang lahat para sa bansang ito.
Siya ay isang boses sa dilim—nagsisindi ng liwanag sa isang sistemang matagal nang nababalot ng kadiliman.
At kung pagbabasehan ang kanyang determinasyon, isa lang ang sigurado—hindi ito ang katapusan ng kanyang kwento.
Mabuhay ka, Atty. Levito Baligod!
‘Yun na!
