MANDAUE CITY, CEBU – Muling napasama sa kontrobersiya ang kilalang aktor na si Baron Geisler matapos itong mahuli dahil sa matinding kalasingan sa Canduman, Mandaue City nitong Sabado ng madaling-araw, Pebrero 22, 2025.
Ayon kay Police Lt. Col. Mercy Villaro, tagapagsalita ng Mandaue City Police Office (MCPO), mismong mga bayaw ng aktor ang tumawag sa mga pulis matapos itong magwala at manghagis ng mga gamit sa kanilang lugar. Dahil dito, agad siyang inaresto sa paglabag sa Mandaue City Ordinance No. 11-2008-434, o ang batas laban sa matinding kalasingan sa pampublikong lugar.
Laseng Mode: ON Na Naman!
Bagama’t hindi seryosong kaso ang kanyang kinasangkutan, hindi ito ang unang beses na nasangkot si Baron sa ganitong isyu. Ang nasabing ordinansa ay may multang P500 lamang—halos katumbas lang ng isang fancy dinner para sa isang artista ng kanyang kalibre. Pero ang tanong ng marami, hanggang kailan niya kakayanin ang paulit-ulit na ganitong eksena sa kanyang buhay?
Shempre, hindi nagtagal sa kulungan si Baron dahil agad na tinubos ng kanyang asawa matapos bayaran ang multa. Ilang oras lang siyang nag-stay sa selda bago nakauwi sa kanilang bahay sa Mandaue. Ngunit kahit mukhang maliit na insidente ito, hindi maiiwasang pag-usapan kung paano ito makakaapekto sa kanyang pangalan at career.
Matatandaang si Baron Geisler ay kasalukuyang gumaganap sa teleseryeng ‘Incognito’ sa ilalim ng ABS-CBN, isang palabas na puno ng aksyon at misteryo kung saan siya gumaganap bilang isang kontra-bida. Ito ang isa sa kanyang malalaking proyekto matapos ang matagal na panahong pananahimik sa industriya. Marami ang natuwa sa kanyang pagbabalik, lalo na’t ipinakita niya ang husay niya sa pag-arte sa serye.
Ngunit sa nangyaring insidente sa Mandaue, may agam-agam ngayon kung paano ito makakaapekto sa kanyang imahe bilang isang aktor. Alam naman ng lahat na matagal nang sinusubukan ni Baron na linisin ang kanyang pangalan matapos ang kanyang mga kontrobersyal na nakaraan. Sa katunayan, ilang beses na siyang sumailalim sa rehabilitation at ipinakita ang kanyang dedikasyon sa pagbabago.
Sa kabila nito, hindi talaga maiiwasang bumalik sa lumang bisyo lalo na kung hindi tuluyang napagtagumpayan ang personal na laban. Ngayon, ang tanong ng marami: Mapapatawad pa ba siya ng industriya, o isa na naman itong major setback sa kanyang comeback?
Sa social media, hati ang opinyon ng publiko. May mga nagsasabing “tao lang si Baron” at deserve niyang bigyan ng second (or third… or fourth) chance. Pero may iba namang nagsasabing, “Hanggang kailan natin siya patatawarin?” Marami na kasing pagkakataon kung saan nangako si Baron na magbabago, pero nauuwi rin sa parehong pattern ng pagiging pasaway.
Hindi naman lingid sa kaalaman ng lahat na si Baron ay isa sa pinakamahuhusay na aktor ng kanyang henerasyon. Mula sa kanyang mga kontrabida roles hanggang sa mga critically acclaimed performances sa pelikula, hindi matatawaran ang kanyang talento. Pero sa showbiz, hindi lang galing sa pag-arte ang puhunan—kasama rin dito ang reputasyon at professionalism.
Kaya ngayon, habang hindi pa naglalabas ng opisyal na pahayag ang ABS-CBN tungkol sa insidenteng ito, marami ang nag-aabang kung paano ito makakaapekto sa kanyang role sa ‘Incognito’. Patuloy ba siyang pagkakatiwalaan ng network, o may posibilidad bang palitan siya sa kanyang role?
Abangan natin ang susunod na kabanata sa buhay ni Baron! Magiging Laseng Warrior Chronicles na naman ba ito o isang wake-up call para sa kanya?
Stay tuned, mga nini!